Amodau
Gydag eira yn dal i orwedd ar y rhan fwyaf o'r mynydd, er fod newidiadau a datblygiadau wedi bod yn natur yr eira ar y llwybr, ar lwybr Llanberis heddiw ddigon tebyg oedd natur yr anawsterau welwyd.

Ar y ffordd i fyny llwybr Llanberis heddiw roedd y cerdded i ddechrau yn gymharol rhwydd gyda dim ond eira newydd tenau i ddechrau, ac yna ychydig o eira newydd ar ben hen eira fwy cadarn ond yn dadmer ychydig yn uwch i fyny. O tua 500m roedd yr eira yma yn oerach a ddim yn dadmer y bore ma.

Wrth deithio yn uwch ar y mynydd roedd mwy o amrywiaeth amodau gydag eira wedi lluwchio yn ddyfn mewn rhai mannau, ychydig o eira newydd ar ben eira mwy rhewllyd mewn mannau eraill ac eira meddal gyda chramen o eira rhewllyd mewn nifer o fannau yn uchel ar y mynydd.

Gwelwyd tystiolaeth eang o eira wedi lluwchio ar ymylon serth yng nghysgod gwynt, ond hefyd ar rai llethrau yn gwynebu y gwynt mewn pantiau, a lle oedd newid mewn goledd y llethr, gydag ambell i ardal o gramen wynt (windslab) meddal ar lethrau yn gwynebu y gwynt wedi eu gweld ar dir llai serth (lle nad oedd yn beryg ar y llethrau yma, ond sy'n awgrymu y gall fodoli mewn llefydd eraill lle y gall fod yn fwy peryglus hefyd).

Gwelwyd amryw o beryglon penodol tebyg i'r adroddiad blaenorol.

Roedd yr ardal o lwybr Llanberis sy'n croesi uwchben Cwm Hetiau yr ochr uchaf i orsaf Clogwyn Du'r Arddu (ar ôl mynd o dan bont y rheilffordd) yn drwm o dan eira, gyda'r llwybr yn gul ac yn serth am rhyw hyd uwchben dibyn sylweddol. Mae mwy o eira eto wedi lluwchio i'r fan yma, gyda chyfran sylweddol o'r ffens ar ymyl y llwybr wedi ei chladdu yn llwyr. Teithwyd lwybr amgen yn y fan yma heddiw (fel dydd Mawrth) i osgoi'r perygl, yn hytrach na'r llwybr arferol, cyn ail ymuno a'r llwybr arferol unwaith heibio i'r ardal beryglus.

Uwchben Allt Goch roedd ardaloedd eang lle oedd y llwybr yn gwbl llawn o eira, gyda llethrau islaw y llwybr hefyd o dan eira, a rhannau o'r rheilffordd islaw hefyd yn llawn eira. Er bod rhywfaint o eira meddal o hyd, roedd yn gorwedd ar ben eira rhewllyd, ac mae'n ymdebygu i amgylchiadau sydd wedi achosi damweiniau angheuol yn yr ardal yma yn y gorffenol. Mae posibl i'r perygl yma gynyddu wrth i arwyneb yr eira yma galedu yn y dyddiau i ddod.

Uwchben Allt Goch roedd hefyd ardaloedd o eira oedd yn gwbl wyn, heb unrhyw gerrig na ffurfiau eraill yn cyrraedd gwyneb yr eira. Golyga hyn bod cyfnodau o gerdded y 'llwybr' heb unrhyw nodweddion gweladwy o gwbl i'w dilyn yn y niwl a lluwchfeydd, lle oedd angen dibynnu yn llwyr ar dechnegau cyfeiriadu (navigation) yn unig i deithio ar y mynydd. Gall amgylchiadau tebyg fodoli yn y dyddiau i ddod.

Ym Mwlch Glas roedd tystiolaeth o luwchio eang. Er nad oedd posib arsylwi ar y nodweddion yn llawn oherwydd gwelededd gwael ar y pryd, ymddengys bod bargod (cornice) sylweddol yn datblygu yn y fan yma lle mae llwybrau y PyG a'r mwynwyr yn dringo i'r bwlch, sydd wedi tyfu eto ers yr adroddiad blaenorol. Byddai rhaid teithio trwy y lluwchfeydd a bargod posib yma i gyrraedd Bwlch Glas ar lwybr y PyG ac ar lwybr y mwynwyr, ac mae bargod tebyg yn debygol o fodoli ar hyd ymylon cyfagos uwchben cyfran hirach o'r llwybrau yma.

Diwrnod cymylog a niwliog, ond yn syndod o sych, gyda gwyntoedd cymedrol. Cafwyd ambell i gawod yn hwyrach yn y dydd yn disgyn fel eira (wedi dadmer yn rhannol ac ail rewi) hyd yn oed yn isel ar y mynydd.

Ar y ffordd i lawr roedd yr eira dan draed yn dadmer yn raddol islaw tua 700m.

Offer hanfodol
Offer cerdded addas tymhorol, yn cynnwys goleuadau (fel lamp pen neu ddwy bob un).

Bydd cario caib rew a chrafangau cerdded (mountaineering crampons) yn cynnig dewisiadau mwy diogel ar y mynydd.

Bydd cario gogls (fel gogls sgïo) yn cynnig modd o warchod y llygaid rhag gwyntoedd ac eira yn lluwchio i weld yn rhwyddach er mwyn teithio yn fwy diogel ar y mynydd.

Gwybodaeth Ychwanegol
Ar ddydd Gwener yr adroddiad mae'r rhagolygon yn awgrymu bydd y tymheredd ar y copa o dan y rhewbwynt i ddechrau, ond y bydd yn codi yn gyflym uwchben y rhewbwynt yn ystod dydd Sul. Mae darogan i'r tymheredd ar y copa fod cyn ised â -4ºC (gan deimlo fel ei bod cyn ised â -12ºC ar adegau). Bydd yn teimlo yn oer iawn hefyd yn y gwynt cryf a glaw o ddydd Sul ymlaen, pan fydd y tymheredd wedi codi.

Mae hefyd darogan iddi fwrw ar adegau, gydag eira yn debygol dros nos heno (nos Wener), a glaw yn debygol dydd Sul (ac ar adegau wedi hyn).

Golyga hyn y bydd amodau gaeafol ar y mynydd yn parhau i ddatblygu at ddydd Sadwrn, gyda rhywfaint o ddadmer yn is ar y mynydd. Wedi hyn bydd newid sylweddol a sydyn yn amodau ar y mynydd.

Er ei bod rhagweld risg llithriadau eira (avalanches) y tu hwnt i gwmpas yr adroddiad hwn ac er fod peryglon yn barod ar rai llethrau ar y mynydd, mae arwyddion cryf am gyfnod o ansefydlogrwydd eira sylweddol yn ystod dydd Sul 11-1-2026:
Mae eira sylweddol yn gorwedd yn eang ar y mynydd, gyda lluwchfeydd dyfn mewn rhai mannau.
Mae darogan i'r tymheredd godi yn sylweddol yn ystod y dydd.
Mae darogan am gyfnodau sylweddol o law yn ystod y dydd, fydd yn achosi dadmer cryf.
Mae darogan am wynt deheuol cryf fydd hefyd yn ychwanegu i'r dadmer.

Bydd y newidiadau cyflym yma yn creu peryglon anarferol drwy y cyfnod dadmer yma. Fel rheol bydd llithradau yn dueddol o ddigwydd ar lethrau rhwng tua  30˚ a  45˚, ond rwyf wedi gweld llithradau ar lethrau llawer llai serth na hyn pan fydd dŵr yn llifo o dan haen o eira.

Gweler y wybodaeth ar ddiwedd yr adroddiad llawn ar ôl y lluniau am fwy o wybodaeth.

Wedi y cyfnod dadmer yma mae'n debygol y bydd llawer yn llai o eira yn gorwedd ar y mynydd, ond mae digon o drwch o eira fel ei bod yn bosib y bydd eira yn parhau mewn rhai mannau, a dylid dal i baratoi i ddod ar draws eira ar y mynydd, er na fydd unrhyw olwg o'r eira yma wrth gychwyn o'r gwaelodion.