Amodau
Roedd eira newydd yn gorwedd ar y mynydd heddiw, gydag eira uwchben tua 400m. Ddigon meddal, gwlyb a thenau oedd yr eira i ddechrau, ond roedd ychydig yn fwy trwchus wrth fynd yn uwch ar y mynydd, gan gynyddol effeithio ar gerdded y llwybrau.

Ar y cyfan prif effaith yr eira newydd o dan draed oedd ei gwneud yn gyffredinol llithrig, ond roedd hefyd yn ei gwneud yn llawer anoddach gweld a dilyn y llwybrau ar y mynydd. Roedd hefyd yn cuddio yr ardaloedd o hen eira sydd dal i fodoli mewn rhai mannau, ac sydd erbyn hyn yn galed, rhewllyd a llithrig.

Ar lwybr y PyG (a mwynwyr) ar wahân i'r eira newydd y prif anhawster oedd yr ardal o hen eira caled o dan Bwlch Glas uwchben tua 900m, gyda posibilrwydd o lithriadau difrifol oddi ar y llwybr yn rhai llefydd o hyd. Bydd amodau wedi newid yn sylweddol eto erbyn y bore, gyda posibilrwydd o fwy o ardaloedd rhewllyd ac eira wedi lluwchio (gweler Gwybodaeth Ychwanegol isod).

Roedd llwybr Llanberis o dan eira uwchben tua 450m, gyda'r eira yn feddal a gwlyb iawn uwchben hyn, gydag ardaloedd helaeth all droi yn rhewllyd iawn erbyn y bore  (gweler Gwybodaeth Ychwanegol isod). Roedd mwy o orchudd o eira o waelod Allt Goch, gyda cyfuniad o eira newydd tenau, ardaloedd o hen eira ar hyd y llwybr, ac eira newydd wedi lluwchio yn fwy trwchus ar hyd y llwybr.

Roedd yn amlwg bod effeithiau dylanwad gwynt i'w gweld ar yr eira yn gynyddol yn ystod y dydd, gyda lluwchio cryf ar wyntoedd dwyreiniol a gogleddol. Nid oedd effaith gwynt i'w weld yn sylweddol ar lwybr y PyG yn y bore, ond gyda gwyntoedd cryfach mwy gogleddol y prynhawn mae'n debygol bod eira wedi lluwchio ar rai rhannau o'r llwybr yma yn hwyrach yn y dydd. Ar lwybr Llanberis roedd lluwchfeydd mwy lleol i'w gweld mewn nifer o fannau, gydag ardaloedd sylweddol yn cael eu sgrafellu gan y gwynt gan adael ardaloedd o eira tenau ond caled a rhewllyd.

Uwchben Bwlch Glas ar lwybrau Llanberis, PyG, mwynwyr a Chwellyn roedd y llwybr wedi ei orchuddio yn gyfan gwbl gan haen o eira gan fod yn galed rhewllyd a llithrig mewn ambell i fan.

Diwrnod cymylog a niwliog gydag eira cyson, yr eira yn disgyn yn drwm am gyfnodau yn ystod y bore. Gwyntoedd sylweddol, gan fod yn dawelach yn y bore, ac yn gryf yn uwch ar y mynydd ac yn y prynhawn.

Offer hanfodol
Offer cerdded addas tymhorol, yn cynnwys goleuadau (fel lamp pen neu ddwy bob un).

Bydd cario caib rew a chrafangau cerdded (mountaineering crampons) i'r traed yn cynnig dewisiadau mwy diogel ar y mynydd. Gallai pigau bychain hefyd fod o fudd yn ychwanegol i hyn gydag amodau tenau, rhewllyd ac amrywiol yn debygol ar draws rhai ardaloedd o'r mynydd.

Bydd cario gogls (fel gogls sgïo) yn cynnig modd o warchod y llygaid i weld yn rhwyddach er mwyn teithio yn fwy diogel ar y mynydd.

Gwybodaeth Ychwanegol
Ar ddydd Gwener yr adroddiad mae'r rhagolygon yn awgrymu bydd tywydd amrywiol iawn yn y dyddiau i ddod, gyda heriau amrywiol o ddydd i ddydd, gan achosi i amodau dan draed newid yn gyflym. Mae cyfuniad o dymheredd isel iawn, eira, gwyntoedd amrywiol, gan fod yn gryf iawn ar adegau, i gyd i weld yn dod a thrafferthion eu hunain ar wahanol adegau.

Ar ddydd yr adroddiad mae'r rhagolygon yn awgrymu bydd y tymheredd ar y copa  o dan y rhewbwynt am ran helaeth o'r cyfnod hyd yr adroddiad nesaf, gan fod sawl gradd o dan y rhewbwynt ar adegau. Mae darogan i'r tymheredd ar y copa fod cyn ised â -6ºC (gan deimlo fel ei bod cyn ised  â -18ºC ar adegau).

Mae hefyd darogan iddi fwrw ar adegau, gydag eira yn debygol yn uwch ar y mynydd, ond hefyd ar draws y mynydd ar adegau. Ymddengys bod yr eira yma fwyaf tebygol nos Sadwrn ac i mewn i ddydd Sul, ond yn bosib ar adegau eraill hefyd.

Gydag adegau o dymheredd isel ar draws y mynydd, ac ardaloedd gwlyb ac eira wedi hanner dadmer, mae amodau rhewllyd yn debygol ar adegau (fore Sadwrn yn arbennig), yn enwedig ar uchder canolig ar y mynydd.

Bydd y gwynt hefyd yn ychwanegu at heriau ar y mynydd, gan fod yn berygl ohono ei hun ar adegau, ond hefyd yn effeithio ar welededd a lluwchio eira (all gyfrannu at beryglon llithriadau eira). I gymhlethu pethau ymhellach bydd y cyfeiriad yn amrywio yn sylweddol hefyd.

Mae adegau o welededd gwael iawn yn debygol pan bydd hi yn amhosibl gweld y llwybrau er mwyn eu dilyn.

Gyda darogan dipyn o dywydd braf at ddydd Sadwrn mae hefyd werth nodi amgylchiadau heriol sy'n bodoli o ran eira yn barod, y posibilrwydd o amodau rhewllyd iawn, a'r dirywiad yn y tywydd sy'n cael ei ragweld at ddiwedd y dydd. Gallai y cynnydd yn y gwynt, a'r posibilrwydd o eira newydd yn rhwydd effeithio ar ddiwedd y dydd o unrhyw newid mewn amseriad, neu o fod ychydig yn hwyr yn dod lawr o'r mynydd.