Amodau
Er bod yr eira wedi parhau i ddadmer, roedd rhywfaint o eira yn dal i orwedd ar y mynydd. Digon clytiog oedd unrhyw eira, ac yn gyffredinol dim ond clytiau ac esgyrn eira oedd yn gorwedd ar y mynydd, ar wahân i rai ardaloedd mwy helaeth yn uwch i fyny. Roedd rhai clytiau yn llenwi'r llwybr cyn ised â 550m.
Roedd yr eira yn gorchuddio'r llwybr yn llwyr neu bron yn llwyr mewn ambell fan ar lwybr Llanberis, ac roedd ardaloedd sylweddol o lwybrau'r PyG/mwynwyr o dan eira o hyd.
Roedd yr holl eira a welwyd heddiw yn meirioli, ac er yn gyffredinol feddal ar y wyneb roedd natur ddigon cadarn i'r rhan fwyaf o eira welwyd, gyda rhai mannau yn ddigon rhewllyd yn enwedig yn uwch ar y mynydd. Er mai dadmer oedd yr eira, roedd mewn cyflwr ddigon llithrig mewn rhai mannau.
Gwelwyd ambell i fargod (cornice) yn ystod yr arsylwadau, er mai cymharol fychan oeddynt o ran maint, byddai dal yn syniad annoeth iawn cerdded ar, neu yn agos i'r rhain, hyd yn oed os nad yw'r strwythur yn crogi uwchben gwacter (overhanging).
Roedd eira sylweddol o hyd ar lwybr y PyG a llwybr y mwynwyr o dan Bwlch Glas.
Gwelwyd nifer o holltau bychain ar hyd ymyl uchaf yr hen luwchfeydd sy'n gorwedd ar ymyl y grib rhwng Yr Wyddfa a Carnedd Ugain heddiw (gweler lluniau). Mae hyn yn awgrymu bod yr eira yma wedi bod, neu yn symud yn yr ardal yma. Mae'r eira yma uwchben rhan uchaf llwybr y PyG a llwybr y mwynwyr. Ni ellir rhagweld os bydd hyn yn arwain at ansefydlogrwydd pellach neu beidio uwchben llwybr poblogaidd, ond dylai cerddwyr wneud dewis gwybodus ynglŷn â'r perygl cyn penderfynu croesi'r rhan yma o lwybrau y PyG a mwynwyr, yn hytrach na dim ond cymryd bod y llwybrau yma am fod yn ddiogel i'w teithio drwy'r ardal yma.
Diwrnod cymylog a niwliog, gyda gwynt cryf, ac ysbeidiau cliriach byrion. Mesurwyd y tymheredd ar y copa yn 2˚C ar y pryd.
Offer hanfodol
Offer cerdded addas tymhorol, yn cynnwys goleuadau (fel lamp pen neu ddwy).
Bydd cario gogls eira (fel gogls sgïo) yn rhoi modd i warchod y llygaid rhag gwyntoedd oer ac eira yn lluwchio, gan ei gwneud yn rhwyddach i weld er mwyn teithio yn fwy diogel ar y mynydd.
Bydd cario caib rew a chrafangau cerdded (crampons) yn rhoi dewisiadau i gadw'n ddiogel ar y mynydd.
Roedd posib cerdded llwybr Llanberis heb offer technegol gyda gofal heddiw, ond gyda posibilrwydd i amodau droi yn rhewllyd eto byddai cario caib rew a phigau bychain yn ddoeth i roi dewisiadau i gadw yn ddiogel yn y dyddiau i ddod.
Roedd angen caib rew a chrafangau cerdded i alluogi symud yn ddiogel ar eira llwybrau PyG a mwynwyr (gan gymryd bod peryglon eraill posib), hyd yn oed os mai rhan gymharol fechan o'r llwybr oedd hyn.
**Gwybodaeth Ychwanegol**
Ar ddydd Gwener yr adroddiad mae'r rhagolygon yn awgrymu y bydd cyfnodau o ddadmer, a chyfnodau o ail rewi sylweddol yn bosib ar y mynydd yn ystod y cyfnod hyd nes yr adroddiad nesaf dydd Mawrth. Mae darogan y bydd y tymheredd ar y copa fod cyn ised â -5˚C, gan deimlo cyn ised â -12˚C ar adegau.
Mae rhywfaint o ddadmer pellach yn bosib, a'r eira yn cilio rhywfaint, ond os bydd y tymheredd yn newid oddeutu'r rhewbwynt gall unrhyw eira droi yn galetach a mwy rhewllyd eto. Mae'n bosib hefyd i rew ddatblygu ar amrywiol uchderau am gyfnodau, gan ei gwneud yn anoddach i osgoi unrhyw eira sy'n gorwedd ar y llwybr oherwydd rhew ar ymylon y llwybr.
Ar ddydd yr adroddiad mae'r rhagolygon yn awgrymu bod unrhyw eira newydd sylweddol yn annhebygol, ond mae rhywfaint o eira newydd yn bosib ar adegau.