Amodau
Unwaith eto y prif anhawster ar y mynydd oedd ardaloedd rhewllyd. Er nad oedd yn cyfrannu yn sylweddol at yr anhwsterau yma roedd hefyd sgimpan denau iawn o eira uwchben tua 700m. Prin bod yr eira yn bodoli ar y mynydd, ond gall bod mwy ar y ffordd cyn ddiwedd yr wythnos (gweler Gwybodaeth Ychwanegol isod).

Yr ardal oedd yn achosi fwyaf o drafferthion uwaith eto oedd ar lwybr y PyG a llwybr y mwynwyr (lle maent yn cyd-redeg) rhwng tua 800m a 980m. Roedd y rhew yn y fan yma wedi datblygu ac ehangu ymhellach gyda nifer o fannau lle oedd rhew caled llithrig ar draws y llwybr cyfan nad oedd posib ei osgoi. Mae'r rhew yma yn ddigon sylweddol fel bod angen offer mynydda gaeaf i'w groesi yn ddiogel (yn hytrach na mynd amdani a gobeithio am y gorau).

Er ymddangosiad gwynach yn uwch ar y mynydd roedd cerdded y grib o Fwlch Glas i’r copa ychydig yn llai trafferthus er bod yr amodau rhewllyd erbyn hyn yn ei gwneud yn ddigon llithrig dan draed yma hefyd, ac roedd angen gofal sylweddol yma hefyd erbyn hyn.

O sgwrsio gyda cerddwyr eraill ar y mynydd mae'n debyg bod yna ardaloedd mwy rhewllyd ar rannau o lwybr Llanberis hefyd erbyn hyn, yn enwedig yng nghyffiniau Allt Moses.

Roedd llai o rew yn isel ar lwybr y PyG, gyda dim ond darnau bychan a chyfyngedig o rew wedi eu gweld o dan 800m.

Bore cymylog, ond yn clirio drwy ganol y bore, gyda gwyntoedd ysgafn, a chawod ysgafn neu ddwy yn disgyn yn gynnar yn y dydd. Diwrnod prysur ar y mynydd. 

Offer hanfodol
Offer cerdded addas tymhorol, yn cynnwys goleuadau (fel lamp pen neu ddwy bob un).

Bydd cario caib rew a rhyw fath o bigau i'r traed yn cynnig dewisiadau mwy diogel ar y mynydd.

Bydd cario gogls (fel gogls sgïo) yn cynnig modd o warchod y llygaid rhag eira yn lluwchio er mwyn gweld i dethio yn fwy diogel ar y mynydd wrth ddod ar draws rhew ac eira.

Gwybodaeth Ychwanegol
Ar ddydd Mawrth yr adroddiad mae'r rhagolygon yn awgrymu bydd y tymheredd ar y copa o dan y rhewbwynt am y rhan fwyaf o’r cyfnod hyd nes yr adroddiad nesaf ddydd Gwener, gan fod sawl gradd o dan y rhewbwynt am gyfnodau sylweddol, ac ar draws ardaloedd ehangach o'r mynydd. Mae darogan i'r tymheredd ar y copa fod cyn ised â -6ºC (gan deimlo fel ei bod cyn ised â -16ºC ar adegau).

Ar ddydd yr adroddiad mae darogan i'r tymheredd aros yn isel, gan oeri ymhellach at ddiwedd yr wythnos, ond hefyd gyda'r tebygolrwydd iddi fwrw hefyd yn cynyddu. Mae darogan am gawodydd eira ar draws ardaloedd sylweddol o'r mynydd, gyda rhywfaint o eira yn debygol, ac eira mwy sylweddol yn bosib. Mae'r eira yma yn ymddangos yn bosib erbyn nos Fercher, gan fod yn gynyddol debygol drwy dydd Iau a dydd Gwener i fewn i'r flwyddyn newydd.

Bydd yr eira yma yn cael ei effeithio gan wyntoedd sylweddol hefyd.

Golyga hyn ei bod yn debygol y bydd amodau rhewllyd yn parhau ac yn datblygu ymhellach, gyda eira hefyd yn gynyddol ddatblygu ar draws ardaloedd o'r mynydd, gyda posibilrwydd i beryglon eira yn hel o dan ddylanwad gwynt hefyd ddatblygu os bydd eira mwy sylweddol yn disgyn. Gall fod cyfnodau o welededd gwael iawn wrth i eira luwchio gan wneud gweld i deithio ar y mynydd yn anodd ar adegau.

Gan ddymuno blwyddyn newydd dda i bawb!
Gerwyn, Fyny a Lawr